Rev 15 | TUCT | STEP | Ra matag ila le naghita gabua tiina ite ivot izi sambam imin ilaal. Ilaal tawe, ite kat. Nagham ŋgar pani le ŋgar tsiau imbool. Naghita aŋela liim ve ru tikis pataŋani liim ve ru tau sasaghatizi kat. Pataŋani tawe pale tivot murei geeg to tipasov aatyavyav to Maaron.

aSyg 11:18

bSyg 4:6, 12:11, 13:15+

dIgham 15:1+; Lo 32:4+; Mbo 111:2

eMbo 86:9

fSyg 11:19

gIgham 40:34

Revelation of John 15

Aŋela liim ve ru tikis pataŋani liim ve ru

1 Ra matag ila le naghita gabua tiina ite ivot izi sambam imin ilaal. Ilaal tawe, ite kat. Nagham ŋgar pani le ŋgar tsiau imbool. Naghita aŋela liim ve ru tikis pataŋani liim ve ru tau sasaghatizi kat. Pataŋani tawe pale tivot murei geeg to tipasov aatyavyav to Maaron. ^a

Tamtamon to Maaron tipait eeza ila mbouŋ

2 Ve naghita gabua ite. Tigharaata pa galas tomania yav. Gabua tawe, ghitooŋa imin te, ve Maaron tamtamon tooni tiyooz ila ziige. Ene yes tau tiyooz ariaaŋ, ve tiliiv gabua saghati tomania anunu, ve ilaal to eeza. Yes tiput aghezi pani mako, ve tigham ilaal to eeza mako. Yes tikis gita tau Maaron igham pazi na, ve tipait Maaron eeza. ^b

3 Yes timbou mbouŋ to Mose, i besooŋa to Maaron. Mbouŋ tawe iŋarui Sipsip to Maaron paam. ^{▼▼(15:3) Muuŋ, yes Israela tiyooz ila Te Siŋsiŋai ziige, ve tipait Maaron eeza ila mbouŋ pa uleeŋ tooni. Tamtamon tau saveeŋ ziiri tane isavi zi na tauvene paam. Tipait Maaron eeza ila mbouŋ. Pasaa, Sipsip to Maaron igham mulin zi, ve ighur atuya pa koiazŋa.}

Timbou tauvene:

“O Maaron, Tiina tsiei, yo saksakim ve uŋgin gabua naol isov. Uraat tau yo ughamgham zi, ene tintiina kat. Nigham ŋgar pazi le nirao mako.
Yo kinik tiina kat tau uŋgin nughmariŋ. Ve ŋgar tsio, ene iduduuŋ ve onoon mon. ^d

4 Tiina tsiei, yo mon ta patabuyaaŋ. Tauvene tamtamon tisov aat tiroi payo ve titaghon ŋgar tsio, ve tipait ezam pa tapirim ve poia tsio.
Nughmariŋ pale tisov tilam tiput aghezi payo, ve tipait ghom. Pasaa, ŋgar tsio tau ughurghur duduŋai atuya pa tamtamon, tauta utotoia ivot ighazooŋ wa.” ^e

Oon liim ve ru tau tivon pa aatyavyav to Maaron

5 Murei ra, matag ila le naghita balbaal patabuyaaŋ tau imin rumei izi sambam na. Loolo tau patabuyaaŋ kat na atamana ikaak. Ene loolo tau saveeŋ mbuaaŋ to Maaron tomania tutuuŋ tooni igheen ila. ^f

6 Aŋela liim ve ru tau naghit zi imin maata na, tileep balbaal tawe loolo ve tivot. Yes tikis pataŋani liim ve ru tau sasaghati kat na le irau zi. Aŋela tana nonoghiiŋa toozi iŋgalaaŋ ve milmilia kat. Ve gabua milmilia tau tigharaat zi pa gol na igheen livutin gargarizi. 7 Ra gabua matazi yaryaare paaŋ, toozi ee irei oon geegeu liim ve ru le irau zi. Oon liim ve ru tawe, tigharaat zi pa gol, ve tivon kat pa aatyavyav to Maaron tau ileep irau saawe. 8 Ve Maaron mbonari ve tapiri tomania mbuasa ivot le ipavon Rumei Tiina tau iyooz izi sambam na loolo. Tauta eta irau iloŋ ila mako. Yes aat tileep ve tisaŋan le aŋela liim ve ru tana tipasov uraat toozi to ghuruuŋ pataŋani pa tamtamon le isov, o tiloŋ tila. ^g